歐洲河船真實行程開箱 | Avalon Waterways 浪漫萊茵河之旅—由瑞士玩到荷蘭！

今次小編擺脫過往歐遊模式，主打慢活奢華的旅行節奏。坐上河船 Avalon Waterways，8天由瑞士一路玩到荷蘭！每朝一開眼就係沿岸景色，經萊茵河穿梭法國、德國，最後阿姆斯特丹落船！想知歐洲河船究竟點玩？馬上為大家開箱Avalon Waterways 8天萊茵河之旅！

【8天浪漫萊茵河之旅】瑞士 ➔ 德法邊境 ➔ 德國 ➔ 荷蘭

行程表：

日子(Day)	停泊口岸(Port)
1	瑞士巴塞爾(登船)
2	德國布萊薩赫—黑森林之旅
3	法國史特拉斯堡（Strasbourg）
4	德國海德堡（Heidelberg）
5	萊茵河畔峽谷 – 科布倫茨（Koblenz）
6	德國科隆（Cologne）
7-8	荷蘭阿姆斯特丹（Amsterdam）

Day 1：瑞士巴塞爾（Basel）登船

瑞士落機後坐車出發巴塞爾碼頭上船，完成登船手續後，工作人員就會帶領入房。小編今次入住全景套房（Panorama Suite），房型寬闊，最驚艷係床尾直面落地大玻璃，旁邊仲擺放了小沙發同茶几。房內提供個人導賞用耳機、雪櫃、飲用水等，行李則可以輕鬆放入床底。最貼心係浴室採用乾濕分離，仲提供法國名牌 L’Occitane® 浴室用品！電視仲會介紹聽日活動，甚至可以安排房內用餐（In-room Dining）。

💡 登船當日船上貼心提供輕食作為午餐；而船上亦有24小時開放嘅Club Lounge 提供自助咖啡機、茶水同零食等，完全唔怕會肚餓！之後順道參觀頂層 Sky Deck，甲板睇景簡直一流！

Day 2：德國布萊薩赫 — 黑森林之旅（Black Forest）

第二日深入德國著名景點黑森林！首先參觀福格茨鮑爾諾夫露天博物館（Vogtsbauernhof），同想像中嘅博物館完全唔同，實景高度還原黑森林巨型農舍，附近亦有職人現場示範工藝，完全感受到數百年前當地嘅農舍生活。

室內亦可自由參觀，完全呈現舊時的農舍廚房，可以見到地下煮食用嘅火爐，以及舊時嘅廚具同餐具。

今次更有黑森林傳統家族女生親自介紹大絨球帽（Bollenhut）—黑森林最標誌性嘅象徵之一。大絨球帽純手工打造，並由家族女性代代相傳，未婚女性會戴上紅色絨球，已婚則配戴黑色。咁珍貴嘅服飾只有喺重大節慶先會配戴！

及後出發到鄰近Cuckoo's Nest，由專人示範同講解布穀鳥鐘（Cuckoo Clock）。外殼為純手工木雕，而令咕咕鐘日復日運轉並唔係靠電力，而係靠底部松果砝碼嘅重力驅動。當到點時發出嘅「咕咕」聲，係由內部的微型風箱發出，非常精巧！

既然走進黑森林，當然唔少得正宗嘅黑森林蛋糕！雖然唔少人以為朱古力先係主角，但其實蛋糕靈魂係德國盛產嘅酸車厘子（Morello Cherries）同車厘子白蘭地（Kirschwasser）！只有帶有濃郁車厘子酒香同經精製車厘子夾層嘅，先算得上正宗黑森林蛋糕。

Day 3：法國史特拉斯堡（Strasbourg）

第3日到達德法邊境—史特拉斯堡，由當地導遊帶團走入小法國區（Petite France），介紹運河旁的中世紀木桁架房屋。糖果配色的牆身同木條相間，真係好似童話小鎮一樣！

及後參觀史特拉斯堡主教座堂（Cathédrale Notre-Dame de Strasbourg），它唔止係世界第六高，仲有與別不同嘅單塔設計。當走入教堂，親眼見證完好保存嘅中世紀彩繪玻璃窗同天文鐘，日光透過彩繪玻璃灑落，完完全全感受到歐洲藝術文化的震撼魅力。

Day 4：德國海德堡 (Heidelberg)

第四日到達德國海德堡，落船跟導遊走到大學廣場（Universitätsplatz），參觀全德國歷史最悠久的高等學府。及後便到糧食廣場（Kornmarkt），於聖母雕像後方便是海德堡城堡廢墟。

登上海德堡城堡園區，參觀著名文藝復興時期建築—奧特海因里希大樓（Ottheinrichsbau）。雖然大樓歷經戰爭後只剩外牆可供欣賞，但這面實體雕刻的「眾神與美德石牆」極具震撼力，上面刻滿無數神話人物與英雄雕像；而大樓下方就係德國藥劑博物館（Deutsches Apotheken-Museum），展示中世紀古老藥房、精密蒸餾器具同各種奇趣藥材，非常值得花時間遊覽！

而鄰近嘅文藝復興式宮殿腓特烈翼樓（Friedrichsbau），外牆上刻有16尊栩栩如生嘅統治者雕像，記錄著當時選帝侯同王室嘅歷史。走到這座宮殿的地下樓層，更可以親眼見證世界現存最大的中世紀木製酒桶——海德堡大酒桶（Großes Fass）！

海德堡大酒桶（Großes Fass）為世界現存最大的木製酒桶之一。大酒桶其實並非用作釀酒，而係同當時嘅「收稅制度」息息相關。因為當時不少農民和酒農沒有足夠貨幣交稅，政府便允許他們用自家釀造嘅葡萄酒來抵稅，最後所有酒便通通倒進這個巨桶混合儲存，容量相當驚人！

行程最後，當然要走上山丘，俯瞰整個舊城區（Historische Altstadt）與內卡河（Neckar）嘅絕美全景！眼下中央橫跨的紅色石拱橋就係著名歷史地標—海德堡老橋，與滿城錯落有致嘅紅瓦屋頂襯托下，如同一幅絕美畫卷。看到眼前這片景緻，難怪中世紀時會有咁多詩人同畫家專程前來尋找靈感！

Day 5：萊茵河畔峽谷 – 科布倫茨

第5日河船正式駛入萊茵河峽谷（Rhine Gorge），亦係整趟行程嘅最大亮點！作為整條萊茵河最精華、被列入世界遺產嘅航段，坐上 Avalon Waterways 就可以用最舒服嘅方式遊覽。當日由 Cruise Director 於船上 Sky Deck 為大家聲音導航，介紹沿途嘅中古世紀城堡同小鎮，例如著名紅酒小鎮阿斯曼豪森、「塔之城」奧伯韋塞爾（Oberwesel）及聖母紅教堂等。

而落船後就出發參觀齊格弗里德機械樂器博物館( Siegfried’s Mechanisches Musikkabinett)，由專人導覽操作多款古董樂器，仲親眼見證全球只剩 7台嘅鎮館之寶 Weber Maesto Orchestrion：一部內藏多款樂器、如同整隊管弦樂隊嘅自動演奏樂器。

另外，當然唔少得品嚐呂德斯海姆咖啡，以萊茵河產區嘅白蘭地加入濃縮咖啡，並鋪上忌廉同朱古力碎，風味相當獨特！

而午餐過後便是自由活動時間，小編同朋友便出發科布林茲高空纜車，俯瞰萊茵河與科布倫茨老城區美景。

Day 6：德國科隆

第 6 日停泊德國科隆，觀光首站就係地標科隆大教堂（Cologne Cathedral），為世界第三高的哥德式教堂，歷時 632 年建成！內部更存放著全歐洲最珍貴的聖物之一「三王聖龕（Shrine of the Three Kings）」與阿耆洛福斯祭壇。

順道遊覽中世紀風格窄屋，當時因政府依據「房屋面寬」收稅，令居民將房子蓋得非常狹窄但往高處延伸，形成獨特的建築風格。

下個目的地便是海因策爾小矮人噴泉（Heinzelmännchenbrunnen），為紀念當地著名的科隆小矮人傳說，雕刻精緻且充滿童趣！

Day 7- 8：荷蘭阿姆斯特丹

好快就到行程尾聲，最後兩日河船會停泊喺荷蘭阿姆斯特丹。當日我們參加了全景玻璃觀光船之旅（Amsterdam Canal Cruise），喺船內可以360度欣賞荷蘭黃金時代留下嘅經典建築，沿途更有導賞員詳細講解。觀光船最大優點就係「完全不受天氣影響」，就算突如其來落雨都可以舒舒服服咁沿著運河遊覽美景！

遊船之旅途經山牆建築（跳舞的房子）、安妮之家同西教堂（Westerkerk）。跳舞的房子係17世紀留低嘅窄屋，現時變得傾斜係因地基鬆軟或地下水位改變導致木樁移位造成 ; 而著名嘅西教堂落成於1631年，一座極具代表性嘅荷蘭文藝復興式新教教堂。

小編今次仲自費參加了風車村與芝士農場半日遊！由市中心出發至雪莫霍恩風車博物館（Museummolen Schermerhorn），了解排水風車內部結構與磨坊主生活

下站出發芝士農場Jacobs Hoeve，由家族經營多年的著名老字號乳製品品牌。今次體驗相當特別，竟然可以近距離觀察農場飼養的珍貴 Jersey乳牛！

仲可以參觀芝士廠房，見到整排芝士外，亦有專人介紹牛奶如何經由凝乳、壓模、鹽水醃製到封蠟熟成，最終變成圓餅芝士。

當日觀光完結後，亦尚有時間自由活動，所以順道探索晚上的阿姆斯特丹，為這8天的旅程劃下句號。

Avalon Waterways 船上餐飲體驗

整趟旅程的每日膳食都相當豐富！船上早餐同午餐採用自助餐形式，而晚餐則提供精緻四道菜。而且廚師每日都會親自上岸採購新鮮食材，每日都可以品嚐在地風味！餐飲方面會免費提供精選紅白餐酒、啤酒與汽水等。此外，連參加觀光行程都會貼心安排膳食，完全唔需要擔心會肚餓！餐單更提供素食（Vegetarian）選擇，服務相當貼心！

船上設有 24 小時開放的 Club Lounge，提供咖啡機、花茶及零食小吃等。

為什麼歐洲旅遊，我會推介 Avalon Waterways？

雖然河船並唔係主流嘅歐遊方式，比起自由行相對彈性較低。但親身體驗過 Avalon Waterways 之後，小編真心覺得非常值得推介！最舒服係完全唔使花幾星期做功課、煩酒店同駁車，就可以極之輕鬆咁享受旅程。

CP 值極高嘅「一價全包」玩法！
- 基本艙房住宿 (Deluxe Staterooms / Panorama Suites / Royal Suite)
- 船上設施 (Sky Deck / Club Lounge / 健身室等)
- 每日三餐包埋酒水、下午茶
- 每日落岸的觀光行程
- 船上免費 Wi-Fi
專業在地導遊，拒絕走馬看花！
- 由當地導遊視角帶你穿梭小巷、分享古蹟背後故事同當地生活細節，拒絕背書式死板介紹！
觀光行程彈性選擇（Classic, Active & Discovery）
- 輕鬆睇景點—選傳統觀光（Classic）
- 想踩單車穿梭大街小鎮或山上健行—選活力探索(Active）
- 想體驗品酒或手作—選文化體驗(Discovery）
全景套房採用超大落地玻璃窗，床尾直面無敵河景！
全程免搬行李換酒店，落船即景點！